Sýningaropnanir í Hafnarborg
Laugardag 26. janúar kl. 15
Laugardaginn 26. janúar kl. 15 verða opnaðar tvær sýningar í Hafnarborg. Það eru sýningarnar Hljóðön – sýning tónlistar, í sýningarstjórn Þráins Hjálmarssonar, tónskálds, og Umrót, með nýjum verkum eftir Mörtu Maríu Jónsdóttur, myndlistarmann.
Sýningin Hljóðön fagnar fimm ára starfsafmæli samnefndrar tónleikaraðar, sem tileinkuð er samtímatónlist og hefur verið á dagskrá Hafnarborgar allt frá árinu 2013. Víkkar því hér starf raðarinnar tímabundið þar sem tækifæri gefst til nánari kynna við tónlist, sem dreifir úr sér með einum eða öðrum hætti í tímaleysi safnarýmisins. Þá verður hugmyndaheimur tónlistarinnar þaninn út fyrir heim hljóðanna og spilar sjónræni þátturinn þar stórt hlutverk. Tónlistin verður þar í senn hljóð og hlutur, flæði tímans er skipt út fyrir flæði í rými, hljóðinu skipt út fyrir hluti, flytjandanum skipt út fyrir hlustandann.
Listamennirnir sem eiga verk á sýningunni eru Ásta Ólafsdóttir, Steina, Steinunn Eldflaug Harðardóttir, Logi Leó Gunnarsson, Jón Gunnar Árnason, James Saunders, Bergrún Snæbjörnsdóttir, Magnús Pálsson, Tom Johnson, Curver Thoroddsen og Einar Torfi Einarsson. Yfir sýningartímann verða einnig haldnir viðburðir, þar sem fram koma ólíkir listamenn og flytjendur. Má þar nefna Harald Jónsson, Ástu Fanneyju Sigurðardóttur, Jennifer Torrence, Marko Ciciliani, Barböru Lüneburg, Skerplu, Berglindi M. Tómasdóttur og fleiri.
Þráinn Hjálmarsson (f. 1987), tónskáld og sýningarstjóri, nam tónsmíðar við Konunglega Konservatoríið í Haag og við Listaháskóla Íslands á árunum 2006-2011. Hefur tónlist Þráins verið flutt víða um heim af hinum ýmsum flytjendum og hljóðfærahópum. Má þar nefna Basel Sinfonietta, BBC Scottish Symphony Orchestra, Sinfóníuhljómsveit Íslands, CAPUT, Vertixe Sonora, auk margra annarra. Samræða og samstarf er stór þáttur af listrænu starfi Þráins og má í þeim efnum nefna umsjón með tónleikaröðinni Hljóðön, auk þverfaglegra samstarfsverkefna við listamenn á borð við Sigurð Guðjónsson, Brynjar Sigurðarson og Veroniku Sedlmair, auk annarra.
Á sýningunni Umrót má sjá ný verk eftir Mörtu Maríu Jónsdóttur. Verkin eru óhlutbundin, á mörkum teikningar og málverks. Myndheimur Mörtu Maríu er ljóðrænn og opinn, heimur sem er á mörkum þess að myndast eða eyðast. Pensilstrokur og flæði litarins virka sem stoðir málverksins, liggja ekki ofan á myndfletinum heldur byggja upp myndina. Hrár ómálaður striginn verður hluti af myndheiminum, eins og þögn í tónlist eða bil í texta. Verkin fjalla um málverkið sjálft, tilurð þess og merking
Marta María Jónsdóttir (f. 1974) nam myndlist við Myndlista- og handíðaskóla Íslands og lauk meistaragráðu í myndlist frá Goldsmiths College í London árið 2000. Hún hefur einnig lokið diplómanámi í hreyfimyndagerð frá London Animation Studio. Í verkum sínum kannar Marta María mörkin á milli teikningar og málverks. Litur skipar stórt hlutverk og ólíkir litafletir, línur og form byggja upp myndflötinn. Í verkunum blandast ósjálfráð teikning við hið vélræna og vísindalega. Línan og teikningin er notuð sem efnisleg bygging myndanna, sem eru lagskiptar og marglaga og saman mynda þær eina heild.
Fyrir opnun sýninganna mun slagverksleikarinn Jennifer Torrence frumflytja nýtt verk eftir Bergrúnu Snæbjörnsdóttur, auk þess að flytja verk Tom Johnsons, Níu bjöllur frá 1979. Flutningur Torrence hefst kl. 14. Viðburðurinn er jafnframt hluti af dagskrá Myrkra músíkdaga.
Sjá nánar um sýningarnar hér og hér.
Frekari upplýsingar veita:
Hólmar Hólm, kynningarfulltrúi Hafnarborgar, s. 663-1609
Þráinn Hjálmarsson, sýningarstjóri, s. 697-761
Dagskrá:
Laugardaginn 26. janúar
Kl. 14: Jennifer Torrence flytur tvö tónverk
Kl. 15: opnun sýninga
Laugardaginn 2. febrúar
Kl. 16: Marko Ciciliani og Barbara Lüneburg flytja eigin tónverk
Föstudaginn 8. febrúar
Kl. 17-23: Safnanótt – tónlist í ótal formum, smiðjur, viðburðir og fleira fram eftir kvöldi.
Sunnudaginn 17. febrúar
Kl. 14: Skerpla og Berglind María Tómasdóttir með tónlistarviðburð
Fimmtudaginn 21. og föstudaginn 22. febrúar
Kl. 13-16: vetrarfrí – hljóðlistasmiðja fyrir börn undir leiðsögn Curvers Thoroddsen
Laugardaginn 23. febrúar
Kl. 15: lokaviðburður nema í hljóðlistaáfanga í Listaháskóla Íslands undir stjórn Curvers Thoroddsen
Sunnudaginn 3. mars
Kl. 16: Ásta Fanney Sigurðardóttir og Haraldur Jónsson flytja gjörninginn BLÓÐSÓL IV
Nánar um dagskrá á heimasíðu safnsins: www.hafnarborg.is
