Það er samþykkt á borgarafundi í Reykjavík árið 1839, að leggja veg frá Austurstræti til suðurs í átt að Tjörninni meðfram læknum sem rennur úr Tjörninni til sjávar. Árið 1848 er þessum vegaspotta gefið nafnið Lækjargata. Læknum er komið í stokk árið 1911 og gatan breikkuð, og þær brýr sem höfðu prýtt götuna, rifnar. Lækjargötu hefur verið einna mest breytt af götum borgarinnar, en húsakostur, sérstaklega að austanverðu, hefur varðveist betur en víðast hvar annars staðar. Lækjartorg gegnt Stjórnarráðinu er á sama tíma skipulagt og fær nafn á sama tíma árið 1848. Þar á horni Austurstrætis og Lækjargötu, er eitt elsta húsið við götuna, Lækjargata 2, byggt árið 1852, og er fyrsta hornhús Reykjavíkur, á sögufrægri lóð, því þetta er fyrsta lóðin í höfuðborginni sem er seld. Lækjargata 2 brann árið 2007, og var endurbyggð bæði stærri og hærri en í svipuðum stíl strax árið eftir. Við Lækjargötu standa markar merkar byggingar, sem hafa bæði sögulegt, menningar og pólitískt gildi, eins og Stjórnarráðið, skrifstofa Forsætisráðherra, byggt sem tutugshús á árunum 1761 – 1771. Menntaskólinn í Reykjavík byggður árið 1846, Bernhöftstorfan, byggð á árunum 1834 til 1905. Nýjasta viðbótin við Lækjargötu er Hafnartorg, gegnt Arnarhóli, en þar lauk framkvæmdum árið 2020. Lækjargata er 450 metra löng og liggur frá Fríkirkjuvegi við Reykjavíkurtjörn, að Geirsgötu við austurhöfnina, vestan við Arnarhól.
Reykjavík 28/10/2024 : A7C R – FE 2.4/40mm G
Ljósmyndir & texti : Páll Stefánsson
