Framkvæmdir standa yfir við byggingu 72 íbúða á svokölluðum Brynjureit í miðborginni á sameinaðri lóð Hverfisgötu 40-44 og baklóðanna Laugavegs 27a-27b, þar sem verður blönduð byggð með íbúðim, verslunum og þjónustu. Meðalstærð íbúðanna er um 65 m2. Verklok eru áætluð í ársbyrjun 2019.
Brynjureiturinn samanstendur af þremur húsum sem tengjast með sameiginlegum kjallara. Húsið við Hverfisgötu er fimm til sex hæðir og þar verða 49 íbúðir. Í Laugavegshúsunum, sem reistu eru ofan á bílakjallara byggingarinnar, verða 23 íbúðir. Húsin eru þrjár hæðir auk laufskála á þaki sem tengist þakgarði. Íbúðirnar eru á bilinu 35-80 m2 og ættu að henda fyrstu kaupendum, þeim sem vilja minnka við sig húsnæði eða vilja eiga litla íbúð miðsvæðis í borginni.
Kristján Svanlaugsson hjá verktakafyrirtækinu Þingvangi sem annars framkvæmdir, segir að þétting byggðar, eins og á sér stað á Brynjureitnum, krefjist mikillar skipulagningar. „Þetta er mjög þröngt og erfitt og við þurfum að spila vel með borginni til þess að þetta gangi upp.“
