Hádegistónleikar í Hafnarborg – Sigrún Hjálmtýsdóttir
Þriðjudaginn 3. mars kl. 12 mun Sigrún Hjálmtýsdóttir, sópran, best þekkt sem Diddú, koma fram á næstu hádegistónleikum í Hafnarborg, þar sem hún mun flytja uppáhaldsaríurnar sínar, ásamt Antoníu Hevesi, píanóleikara og listrænum stjórnanda tónleikaraðarinnar.
![](https://i0.wp.com/icelandictimes.com/cdn-cgi/image/width=605,height=206,fit=crop,quality=90,format=auto,onerror=redirect,metadata=none/wp-content/uploads/2020/02/Hádegistónleikar-í-Hafnarborg.jpg?resize=605%2C206&ssl=1)
Sigrún Hjálmtýsdóttir hóf feril sinn á sviði dægurtónlistar. Síðar stundaði hún sígilt söngnám við Guildhall School of Music and Drama í London og hélt síðan til Ítalíu í framhaldsnám. Frumraun sína á óperusviði þreytti hún í hlutverki dúkkunar, Olympiu, í Ævintýrum Hoffmanns í Þjóðleikhúsinu. Meðal verkefna hennar hjá Íslensku óperunni eru hlutverk Súsönnu í Brúðkaupi Fígarós, Gildu í Rigoletto, Papagenu og Næturdrottningarinnar í Töfraflautunni, Lúsíu í Lucia di Lammermoor, Víolettu í La traviata, Adínu í Ástardrykknum og Rósalindu í Leðurblökunni, auk þess sem hún hefur tekið þátt í óperuuppfærslum á Listahátíð með Íslensku óperunni og Þjóðleikhúsinu.
![](https://i0.wp.com/icelandictimes.com/cdn-cgi/image/width=1170,height=780,/wp-content/uploads/2020/02/Sigrún-Hjálmtýsdóttir-mynd-1.jpg?resize=1170%2C780&ssl=1)
Sigrún hefur margoft komið fram með Sinfóníuhljómsveit Íslands sem og erlendum hljómsveitum víða um Evrópu og í Bandaríkjunum. Hún hefur hljóðritað fjóra geisladiska við undirleik Sinfóníunnar en alls hefur hún sungið inn á rúmlega 70 hljómplötur. Þá kom hún bæði fram á stórtónleikum José Carreras og Placido Domingo hér á landi. Undanfarin ár hefur hún m.a. komið fram á tónleikum í Frakklandi, Rússlandi, Kanada og Kína. Síðast söng Sigrún við Íslensku óperuna hlutverk Næturdrottningarinnar í Töfraflautunni, fyrstu óperusýningunni í Hörpu, haustið 2011 og hlaut hún Íslensku tónlistarverðlaunin fyrir túlkun sína á hlutverkinu. Árið 1995 var Sigrún sæmd hinni íslensku fálkaorðu og árið 1997 finnsku ljónsorðunni.
![](https://i0.wp.com/icelandictimes.com/cdn-cgi/image/width=601,height=800,fit=crop,quality=90,format=auto,onerror=redirect,metadata=none/wp-content/uploads/2020/02/Antonía-Hevesi-mynd.jpg?resize=601%2C800&ssl=1)
Antonía Hevesi, píanóleikari, hefur frá upphafi verið listrænn stjórnandi hádegistónleika í Hafnarborg, þar sem hún hefur fengið marga af fremstu söngvurum landsins til liðs við sig. Hádegistónleikar eru á dagskrá Hafnarborgar fyrsta þriðjudag hvers mánaðar yfir vetrartímann.
Tónleikarnir hefjast kl. 12 og standa yfir í um hálfa klukkustund. Húsið opnar kl. 11:30 og tónleikarnir eru öllum opnir á meðan húsrúm leyfir. Aðgangur ókeypis.
Frekari upplýsingar veita:
Antonía Hevesi, listrænn stjórnandi, s. 864 2151
Hólmar Hólm, kynningarfulltrúi Hafnarborgar, s. 585 5793
![](https://i0.wp.com/icelandictimes.com/cdn-cgi/image/width=604,height=78,fit=crop,quality=90,format=auto,onerror=redirect,metadata=none/wp-content/uploads/2020/02/Hafnarborg.png?resize=604%2C78&ssl=1)