Gleðilegt ár. Íslendingar skutu mikið upp og sprengdu nú um áramótin, enda veður var með besta móti um allt land. Þó féllu stærstu bomburnar á nýársdag. Guðni Th Jóhannesson sjötti Forseti Íslands tilkynnti í nýársávarpi sínu að hann sækist ekki eftir endurkjöri, eftir tvö kjörtímabil. Eins tilkynnti síðasta prinsessa Íslands, Margrét Þórhildur II Danadrottning að hún myndi setjast í helgan stein, 83 ára gömul, eftir að hafa verið drottning dana, grænlendinga og færeyinga í 52 ár. Og krónprinsessa íslendinga sín fyrstu fjögur ár. Friðrik krónprins tekur við keflinu, en hver verður næsti Forseti Íslands, það verður spennandi að sjá, en fyrstur til að lýsa yfir framboði var Halldór Laxness Halldórsson leikari, rithöfundur og uppistandari, betur þekktur sem Dóri DNA. Forsetakosningarnar fara fram eftir fimm mánuði, þann 1. júní. En þetta sagði Guðni Th, meðal annars í nýársávarpi sínu; „Í öflugu lýðræðissamfélagi kemur maður líka í manns stað. Engum er hollt að telja sig ómissandi og skyldurækni á misskildum forsendum má ekki ráða för, því síður eigin hégómi eða sérhagsmunir. Kæru landar, kæru vinir: Af öllum þessum sökum hyggst ég ekki vera í framboði í því forsetakjöri sem verður í sumar, kýs frekar að halda sáttur á braut innan tíðar og er þess fullviss ‒ ef ég má nefna það sjálfur ‒ að Íslendingum muni eins og fyrri daginn auðnast að kjósa sér forseta sem þeir una við.“ Svo mörg voru þau orð.
Ljósmyndir & text : Páll Stefánsson
Reykjavík 01/01/2024 – A7C : FE 1.8/20mm G
