Landmannalaugar, hjarta hálendisins

Hátt uppi

Það eru tæpir 200 km / 120 mi frá Reykjavík inn í Landmannalaugar, hjarta hálendisins. Þarna er maður hátt uppi, 590 metrum yfir sjávarmáli í öðrum og litríkum heimi. Það eru ekki  bara litirnir og jarðhitinn í miðju Friðlandi að fjallabaki sem heilla, þarna byrjar ævintýrið að uppgötva Ísland. Þarna hefst Laugavegurinn, fjölsóttasta hálendis gönguleið landsins, tæplega 50 km leið frá Landmannalaugum í Þórsmörk, í gegnum Hrafntinnusker, Álftavatn og Emstrur. Stutt er í Grænahrygg, Jökulgil og Kýlingavatn. Síðan eru Veiðivötn og Torfajökull, eitt mesta háhitasvæði landsins, í næsta nágrenni. Icelandic Times / Land & Saga skrapp upp í Landmannalaugar nú um helgina, enda er þetta einn besti tími ársins til að heimsækja svæðið, áður en það lokast vegna snjóa í lok mánaðar. Landmannalaugar opnast aftur í lok júní á næsta ári.