Jóhannes S. Kjarval, Skjaldmey, 1961.
Safnanótt, föstudaginn 5. febrúar kl. 18
Kjarvalsstaðir verða opnaðir á ný með stórri sýningu á verkum Jóhannesar S. Kjarvals, föstudaginn, 5. febrúar kl. 18:00, sem jafnframt er Safnanótt. Sýningin hefur hlotið nafnið Hugur og heimur, þar sem meðal annars eru sýnd verk úr sjaldséðu einkasafni Þorvaldar Guðmundssonar og Ingibjargar Guðmundsóttur. Á sýningunni eru málverk og teikningar frá öllum ferli Kjarvals. Þar má kynnast mörgum af hans lykilverkum og fá innsýn í þau meginstef sem voru uppistaðan í lífsverki hans. Annars vegar landið í öllum sínum fjölbreytileika og hins vegar það líf og þær táknmyndir sem Kjarval skynjaði í landinu.
Í vestursal safnsins gefst nú tækifæri til þess að sjá verk úr einstöku listaverkasafni sem hjónin Þorvaldur Guðmundsson, kenndur við Síld og fisk, og Ingibjörg Guðmundsdóttir létu eftir sig. Stóran sess skipar veggverk úr vinnustofu Kjarvals, Lífshlaupið, sem Kjarval málaði á árunum 1929-1933 á veggi vinnustofu sinnar í Austurstræti. Lífshlaupið varð sá heimur sem Kjarval skapaði sem umgjörð um listsköpun sína og daglegt líf. Árið 1933 auglýsti Kjarval sýningu á vinnustofunni þar sem Lífshlaupið var til sýnis. Í blaðagrein frá árinu 1936 er Lífshlaupinu lýst sem verðmætasta veggfóðri á Íslandi.
Í austursal safnsins eru sýnd valin verk úr safneign Listasafns Reykjavíkur, þar sem meginstefin eru landið annars vegar og fantasían hins vegar. Leitast er við að draga fram þann kjarna í listsköpun Kjarvals sem byggir á því sem hugurinn nemur. Hér gefst tækifæri til nýrra kynna við verk Kjarvals þar sem áhersla er lögð á að draga fram þá miklu vinnu sem Kjarval lagði í listsköpun sína með stöðugum æfingum ásamt því að þjálfa sína innri sjón.
Sýningarstjóri er Ólöf Kristín Sigurðardóttir, safnstjóri Listasafns Reykjavíkur. Hönnuður sýningarinnar er Axel Hallkell Jóhannesson. Mikið hefur verið lagt upp úr endurhönnun Kjarvalsstaða til þess að skapa verkum Kjarvals umgjörð sem dregur fram töfra verka hans.
Ólafur Ragnar Grímsson, forseti Íslands, opnar sýninguna kl. 18 og kl. 19 hefst Safnanótt með fjölbreyttri dagskrá til miðnættis.
Kjarvalsstaðir hafa verið lokaðir í janúar vegna endurbóta en verða nú opnaðir aftur með þessari stóru Kjarvalssýningu í báðum sölum. Í tengslum við sýninguna verður viðamikil dagskrá, svo sem listsmiðjur fyrir fjölskyldur, námskeið um líf og list Kjarvals, málþing um listaverkasafnara og listaverkasöfn og margt fleira.
Áslaug Guðrúnardóttir
Kynningar- og markaðsstjóri Listasafns Reykjavíkur
Sími 590-1200 / 820-1201
Listasafn Reykjavíkur
Sími 590-1200
[email protected]
Hafnarhús
Opið daglega 10–17, fimmtudaga 10–20
Kjarvalsstaðir
Opið daglega 10–17
Ásmundarsafn
Opið maí–sept 10–17 / okt.–apríl 13–1
