Þjóðsögur á þriðjudögum í Ásmundarsafni

Föstudaginn 3. febrúar kl. 17.00 var opnuð í Listasafni Reykjavíkur Ásmundarsafni ný sýning sem ber heitið
Sigga Björg Sigurðardóttir og Ásmundur Sveinsson: Andardráttur á glugga.

Á þessari sýningu opnast heimur trölla, álfa, drauga og annarra kynjavera og áhersla lögð á þjóðsögur, ævintýri og ímyndunarafl. Listasafn Reykjavikur hefur um þónokkurt skeið kynnt ný verk starfandi listamanna í Ásmundarsafni, þar sem þau kallast á við myndheim Ásmundar Sveinssonar og einstakt „kúluhús“ hans í Laugardal.

Alla þriðjudaga kl. 16.15 fram í maí verður nú boðið upp á krassandi þjóðsagnalestur fyrir börn og fjölskyldur og verður fyrsti upplesturinn á morgun, þriðjudaginn 7.febrúar.

Lesnar verða hefðbundnar íslenskar þjóðsögur, kryddaðar með glænýjum þjóðsögum eftir Siggu Björgu og sýningin skoðuð í leiðinni.

Sannkölluð gæðastund í lok dags í ævintýrahúsi Ásmundar Sveinssonar í Laugardalnum.

Myndlistarkonan Sigga Björg Sigurðardóttir er kunn af hugmyndaríkum teikningum sínum, innsetningum, myndböndum og bókverkum. Hún hefur skapað einstakan myndheim þar sem fantasía, húmor og hryllingur fara saman hönd í hönd.  Á þessari sýningu vinnur hún meðal annars nýja myndröð út frá íslenskum þjóðsögum og eru verk hennar  unnin jöfnum höndum á veggi sýningarsala og á pappír.

Myndhöggvarinn Ásmundur Sveinsson var einn af frumkvöðlum íslenskrar höggmyndalistar. Fyrr á árum mættu verk hans iðulega andstöðu og hörðum dómum en með tímanum hafa þau fest sig í sessi sem ein af birtingarmyndum íslenskrar sagnahefðar, samfélags og náttúru á 20. öld. Sem barn kynnist hann þjóðsögum og margt af því rataði með beinum eða óbeinum hætti inn í verk hans.