Sýningaropnun
D52 Elsa Jónsdóttir:
Ljáðu eyra
Elsa Jónsdóttir sýnir ný verk á sýningunni Ljáðu eyra í D-sal sem opnar fimmtudaginn 7. ágúst í Listasafni Reykjavíkur – Hafnarhúsi.
Skúlptúrar, hljóðmynd og innsetning ljósa í D-sal í Hafnarhúsinu bjóða upp á margþættan lestur. Við fyrstu sýn má greina gamansemi; form, hljóð og dularfull lýsing mynda líflegt samspil. Við nánari athugun, þegar við leyfum okkur að leggja raunverulega við hlustir, vakna róttækari fagurfræðilegar spurningar: Getur mannleg skynjun verið tjáð í gegnum form? Er athygli virkt ferli sköpunar?
Í verkum sínum leggur Elsa áherslu á formfræði tungumálsins, letur, orð og tilvísanir. Hún rannsakar lestur í sínum víðasta skilningi og færir hugrenningar sínar í tákn, form og stafi. Á síðustu árum hefur hún fært sig úr tvívíðum verkum í almannarými yfir í þrívíðan skúlptúr. Elsa hefur lengi starfað innan myndlistatvíeykisins Krot & Krass, en hafa þau unnið ótal veggverk bæði hér heima og erlendis. Elsa hefur tekið þátt í rekstri fjölmargra listamannarýma í Reykjavíkurborg og þar má sérstaklega nefna Fúsk í Gufunesi.
Sýningin stendur til 21. september 2025.
Sýningaröðin í D-sal hóf göngu sína árið 2007. Hér er listamönnum sem hafa mótandi áhrif á íslenska myndlistarsenu boðið að halda sína fyrstu einkasýningu í opinberu safni.
Sýningarstjóri: Zsóka Leposa
Fimmtudag 7. ágúst 20.00
