Árið 1919 var ákveðið að virkja Elliðaár, byggja virkjun, íbúðarhús og fjós til að rafvæða höfuðborgina. Til að sjá um framkvæmd verksins voru fengnir verkfræðingarnir Aage Broager Christensen og Guðmundur Hlíðdal, en ekki er vitað hver teiknaði sjálft stöðvarhúsið, sem liggur fallega í Elliðaárdal, tveimur kílómetrum frá árósunum. Uppistöðilónið er Elliðavatn, en þaðan eru fimm kílómetrar til árósanna. Sumarið 1921 er virkjunin komin í gagnið, og strax er helmingur húsa í Reykjavík komin með rafmagn, sem er auðvitað bylting.
Hallveig Fróðadóttir og Ingólfur Arnarson fyrsti landnámsmennirnir er fyrstu eigandur Elliðaánna. Eflaust hafa laxveiðar verið stundaðar í Elliðaánum allt frá upphafi byggðar í Reykjavík, þótt áður hafi það verið með öðrum hætti en nú. Fram eftir öldum áttu bændur og kirkjan veiðirétt í Elliðaánum, en við siðaskiptin lagði Danakonungur eignir kirkjunnar undir sig og eignaðist um leið veiðina í Elliðaánum. Í upphafi lét hann stunda veiðarnar fyrir sig en síðan voru þær leigðar út, fyrst árið 1757, að því er talið er. Í dag er Elliðaá ekki bara góð laxveiðiá í miðju höfuðborgarinnar, heldur einstakt útivistarsvæði í og við ánna, þar sem náttúran mætir, á köflum hraðbrautum til og frá höfuðborginni.
Ljósmyndir & texti : Páll Stefánsson
Reykjavík : 16/02/2026 : GFX 100RF – 4.0/35mm
