Margrét Björnsdóttir (1954) eða Sossa eins og hún er oft kölluð opnar einkasýninguna “Bergmál hugans” í Gallerí Fold þann 2. október kl 14:00.
Titill sýningarinnar vísar í hugarástand Sossu þegar hún er að mála. Það getur oft verið einmanalegt hugarferðalag en tilviljanir á borð við hljóð, tónlist og sögur sem hafa áhrif á sköpunina og breyta oft því sem lagt var upp með. Hugmyndir hennar koma flestallar úr litlausum hversdagsleikanum, en Sossa beinir sjónum sínum að bjartsýni og von sem leynast alls staðar inn á milli og fókuserar á litlu sigrana. Sossa er í sífelldri endurskoðun og er forvitin um fólk og umhverfi, sem greinilega kemur í ljós í verkum hennar. Verkin eru oft eins og draumkend augnablik þar sem fólk getur ýmist verið eitt í biðstöðu eða í glaum og gleði umkringt margmenni. “Hugmyndir og raunverk eru sjaldan það sama og er jafnvel ekki það sem áætlað var, ef þú veist nákvæmlega útkomu verður þetta ekki það ferðalag sem er ævintýrið við að mála”, segir Sossa.
Sossa er fædd og uppalin í Keflavík þar sem hún er búsett í dag. Hún lærði myndlist í Myndlistar- og handíðaskóla Íslands, í Kaupmannahöfn og í Boston. Sossa hefur sett upp fjölda einka- og samsýningar ásamt því að hljóta margar viðurkenningar á borð við Fulbright, Súluna – Menningarverðlaun Reykjanesbæjar auk þess að vera valin Listamaður Reykjanesbæjar.
