Daði Guðbjörnsson

Daði Guðbjörnsson „Ekkert raskar athygli fjallsins“

Daði Guðbjörnsson er fæddur í Reykjavík árið 1954. Hann stundaði listnám við Myndlistaskólann í Reykjavík 1969-1976, Myndlista- og handíðaskóla Íslands 1976-1980 og við Rijksakademi van Beldende Kunsten í Amsterdam 1983-1984.

Daði hefur haldið fjölda einkasýninga og tekið þátt í samsýningum hér heima og erlendis. Hann hélt stórar sýningar á olíuverkum á Kjarvalsstöðum árin 1993 og 2011. Árið 2022 var haldin yfirlitssýning á grafíkverkum Daða í Listasafni Reykjanesbæjar í tilefni af því að Daði gaf listasafninu nánast allt höfundarverk sitt í grafík. Sýningin hét Gjöf Daða og var jafnframt gefin út afar vegleg og falleg sýningaskrá. Verk eftir Daða eru í eigu Listasafns Íslands, Listasafns Reykjavíkur og Listasafns Reykjanessbæjar. Árið1997 sýndi Daði fyrst í Gallerí Fold. Síðan þá hefur hann sýnt reglulega í galleríinu og er þetta áttunda einkasýning hans hjá okkur.

Í íslensku listasögunni sem kom út árið 2011 er fjallað um Daða Guðbjörnsson og hlutverk hans í „Nýja málverkinu“ sem svo var kallað, en nýja málverkið spratt upp víða í Evrópu hjá ungum myndlistarmönnum sem andsvar þeirra við löngu tímabili sem einkennst hafði af hugmyndalist. Þar segir:

Margir ungir listamenn nálguðust nýja málverkið með beinum og hispurslausum hætti þar sem tjáning tilfinninga, útrásin og gleðin var í fyrirrúm. Daði Guðbjörnsson kom af miklum ákafa inn á myndlistarvettvanginn í byrjun 9. áratugarins. Hann sýndi expressjónísk verk undir áhrifum frá dönsku Cobra málurunum, en spuni, glaðværð og skreytilist voru þá strax komin fram sem sterk höfundareinkenni Daða. Á sýningunni á Kjarvalsstöðum árið 1993 birtist hann svo sem mótaður listamaður. Þar vakti fagleg og tæknileg kunnátta hans athygli, sem og skemmtileg formanotkun hans og sterk tilfinning fyrir blæbrigðum litrófsins.

Um sýningu sína „Ekkert raskar athygli fjallsins“ segir Daði:

Þegar ég var ungur voru landslagsmyndir ekki beinlínis í tísku og ég hugsaði með mér; „ég get málað landslag þegar ég er orðin gamall, þá er öllum sama.“ Olíumálverk var reyndar ekki vel séð heldur þegar ég var í Myndó handó, það ætti frekar að gera eitthvað sem leit út fyrir að vísa til „dýpri sannleika.“ Mér gekk aldrei vel með þennan djúpa sannleika, ég fór að mála í svolítið villtum stíl sem gekk ágætlega þar til ég fékk leið á tilvistarvandanum og fór í krúsidúllurnar sem voru ljúfari og á mannlegri skala.

Eitt helsta áhugamál mitt er að ganga um náttúru Íslands, um grösugar sveitir, dali og fjörur og horfa á fjöllin og jöklana. Það hefur kveikt í mér löngun til að mála landslag, ég ákvað núna að það væri tími komin á að prófa landslagið en lofa þó líka einhverjum krúsídúllum að vera með, svo þetta verði ekki of djúpt.

Þetta er fjórða einkasýning Daða í Gallerí Fold og stendur sýningin til 11. febrúar.

Opið er í Gallerí Fold á Rauðarárstíg mán-fös 10 – 18 og laugardaga 12 – 16.

Hægt er að skoða sýninguna hér.