Leiðsögn sérfræðinga í Safnahúsinu við Hverfisgötu
Laugardagur 13. febrúar kl. 14
Elizabeth M. Walgenbach sérfræðingur hjá Stofnun Árna Magnússonar í íslenskum fræðum, veitir leiðsögn um sýninguna Sjónarhorn. Elizabeth mun sérstaklega fjalla um þau verk á sýningunni sem tengjast íslenskri handrita- og menningarsögu.
Á sýningunni eru fjórtán handrit frá ýmsum tímum sem hafa að geyma lögbókina Jónsbók, þar á meðal hina svokölluðu Skarðsbók Jónsbókar sem er með glæsilegustu handritum sem gerð voru á Íslandi á fjórtándu öld.
Sunnudagur 14. febrúar kl. 14
Skúli Skúlason prófessor við Náttúruminjasafn Íslands og Háskólann á Hólum gengur með gestum um sýninguna Sjónarhorn. Leiðsögn Skúla mun beinast að sérstöðu íslenskrar náttúru, með hvaða hætti hún birtist í myndheimi, og á hvern hátt viðhorf okkar til náttúrunnar og umgengni mótast af sýn okkar og hugmyndaheimi.
Sjónarhorn – ferðalag um íslenskan myndheim er áhrifamikil sýning um sjónrænan menningararf þjóðarinnar. Í sjö álmum eru jafn mörg sjónarhorn sem tengja saman ólík listaverk og áhugaverða muni, þvert á efni og tímabil. Sýningin er samstarfsverkefni Þjóðminjasafnsins, Listasafns Íslands, Náttúruminjasafns Íslands, Þjóðskjalasafns Íslands, Landsbókasafns Íslands – Háskólabókasafns og Stofnunar Árna Magnússonar í íslenskum fræðum og skartar margvíslegum gripum úr safnkosti þeirra.
Auk Sjónarhorna eru tvær sérsýningar í húsinu, Ganýmedes eftir Bertel Thorvaldsen á vegum Listasafns Íslands og Óravíddir, orðaforðinn í nýju ljósi á vegum Stofnunar Árna Magnússonar.
Aðgöngumiði í safnið gildir. Ókeypis fyrir handhafa árskorts og frítt fyrir börn yngri en 18 ára. Við biðjum gesti að virða þær sóttvarnareglur sem eru í gildi. Grímuskylda og 2 metra reglan gildir á safninu.
ÞJÓÐMINJASAFN ÍSLANDS
SUÐURGATA 41
SÍMI: 530-2200
Safnahúsið
Hverfisgata 15
101 Reykjavik
sími: 530-2210
