Seltjarnarnes hið stóra

Minnsta sveitarfélag að flatarmáli á Íslandi er Seltjarnarnes, en íbúarnir eru 4.750, þeir tekjuhæstu á landinu, búa á 2 km²lands, vestast á Seltjarnarnesi. En nesið sjálft er stórt milli Kollafjarðar og Skerjafjarðar, að Elliðaám, en Reykjavík, höfuðborgin, nær yfir nær allt nesið. Í Seltjarnaneshreppi til forna lá jörðin Vík í Kvosinni, þar hafði myndast þorpið Reykjavík, sem fékk kaupstaðaréttindi árið 1786. Síðan þá hefur Reykjavík, og síðan Kópavogur sölsað undir sig nær allt land sem tilheyrði þessum stóra hreppi. Síðasta breytingin á mörkum Seltjarnarness og Reykjavíkur var árið 1978, þegar eyjarnar þrjár í Kollafirði, Viðey, Engey og Akurey voru færðar yfir til Reykjavíkur. Seltjarnarnes fékk kaupstaðaréttindi árið 1974, og íbúum þarna mun ekki fjölga mikið, því nær allt land, sem á og má byggja á Seltjarnarnesi er nú þegar byggt. Það var bjart yfir Seltjarnarnesi í síðsumarbirtunni, vestast á hinu stóra Seltjarnarnesi, sem gengur út í hinn breiða Faxaflóa.