Vala Fannell með fyrirlestur í Listasafninu

Þriðjudaginn 13. október kl. 17-17.40 heldur Vala Fannell, leikstjóri og verkefnastjóri nýrrar sviðslistabrautar Menntaskólans á Akureyri, Þriðjudagsfyrirlestur í Listasafninu á Akureyri undir yfirskriftinni Sviðslistabraut MA: Kraftmikil nýjung.
Í fyrirlestrinum mun Vala fjalla um nýstofnaða sviðslistabraut Menntaskólans og aðkomu sína að henni. Vala hóf nám í leikstjórn og leiklist í London 2009 og kenndi leiklist á háskólastigi til 2013. Hún rak sitt eigið leikhúsfyrirtæki til 2018 er hún flutti til Akureyrar þar sem hún hefur starfað síðan. Vala kennir einnig við Leiklistarskóla Leikfélags Akureyrar og stundar samhliða mastersnám í leiklistarkennslu við Listaháskóla Íslands. Hún mun leikstýra uppsetningu Leikfélags Akureyrar á leikverkinu Benedikt Búálfur sem verður frumsýnt í febrúar 2021.
Enginn aðgangseyrir er á fyrirlesturinn. Fyrirlestraröðin er samvinnuverkefni Listasafnsins á Akureyri, Verkmenntaskólans á Akureyri, Gilfélagsins og Myndlistarfélagsins á Akureyri. Á meðal annarra fyrirlesara vetrarins eru Sunna Svavarsdóttir, myndlistarmaður, Þóra Sigurðardóttir, sýningarstjóri, Lilý Erla Adamsdóttir, myndlistarmaður, og Aðalsteinn Þórsson, myndlistarmaður.

RELATED LOCAL SERVICES