Dýrslegur kraftur. Sýningatímabil 18.02.-30.05.2021
Ný sýning í Hafnarhúsi
Sýningin Dýrslegur kraftur verður opin gestum í Listasafni Reykjavíkur – Hafnarhúsi, frá og með fimmtudeginum 18. febrúar. Dýrslegur kraftur er samsýning Errós og fimmtán annarra listamanna. Sýningin hverfist um Erró og eru verk hans hryggjarstykki hennar.
Dagur B. Eggertsson, borgarstjóri, veitir viðurkenningu úr Listasjóði Guðmundu S. Kristinsdóttur kl. 17.00. Erró stofnaði sjóðinn til minningar um Guðmundu frænku sína og er þetta í 21. sinn sem listakona fær viðurkenningu úr sjóðnum sem ætlað er að efla listsköpun kvenna.
Á sýningunni Dýrslegur kraftur eru verk eftir stóran hóp áhugaverðra listamanna sett í samhengi verka Errós. Sýningin endurspeglar kraft og hugmyndaauðgi en sækir inntak sitt í hugleiðingar um viðfangsefni og vinnuaðferðir Errós. Hér birtist frjór hugmyndaheimur í fjölbreyttum verkum sem unnin eru í ýmsa miðla þó málverkið sé mest áberandi, en margir atkvæðamiklir málarar eiga verk á sýningunni.
Titill sýningarinnar Dýrslegur kraftur er sóttur í klippimynd eftir Erró frá árinu 2009. Verkið er í safneign Listasafns Reykjavíkur og er myndin hér að ofan af því. Sýningin í heild ber með sér kraftmikla nálgun við lífið og listina og er ögrandi samtal ólíkra listamanna.
Eftirtaldir listamenn, auk Errós, eiga verk á sýningunni: Arngrímur Sigurðsson Baldur Helgason Einar Lúðvík Ólafsson Gabríela Friðriksdóttir Helgi Þorgils Friðjónsson Jóhann Ludwig Torfason Katrín Inga Jónsdóttir Hjördísardóttir Kristinn Már Pálmason Lukas Bury Sara Riel Sigurður Ámundason Valgerður Guðlaugsdóttir Ýmir Grönvold Ýr Jóhannsdóttir Þórdís Aðalsteinsdóttir
Sýningarstjóri er Birgir Snæbjörn Birgisson.
Vegna heimsfaraldursins verður sýningaropnun óformleg. Hafnarhúsið er opið alla daga vikunnar frá kl. 10-17 og til kl. 22 á fimmtudögum.
Sjá fleiri greinar um íslenska myndlistamenn klikka hér
