Litla Gallerý – Endurfæðing

Litla Gallerý
Endurfæðing – Ólöf Erla Einarsdóttir
9.-12. nóvember 2023

Líkaminn! Líkamar! Allskonar líkamar! Heilsan! Þegar fólk missir heilsuna og líkaminn verður veikur gefur það nýja sýn á lífið. Hvað er að? Hvar finn ég til? Hver er ég núna? Ég er sterk og mér batnar. Þú ert að rísa uppúr öskunni. Endurfæðist.

Eftir að hafa upplifað að missa heilsuna tók ég eftir því hvað líkaminn minn var sterkur. Bæði í veikindunum og eftir. Í minni endurhæfingu byrjaði ég að mála aftur. Þetta er mín hugleiðsla. Það fyrsta sem mig langaði að mála voru líkamar. Konur og karlar. Allskonar líkamar saman og flæktir saman. Svartir og hvítir með bleikum og gullnum þráðum. Andlitslausir líkamar. Sterkir líkamar. Endurfæddir.

Ólöf Erla er menntaður grafískur hönnuður með BA gráður frá Listaháskóla Íslands. Hún á og rekur sitt eigið fyrirtæki SVART Hönnunarstúdíó í Hafnarfirði sem tekur að sér auglýsingahönnun allskonar, myndatökur og myndvinnslur. Síðustu ár hefur Ólöf Erla skapað myndlist með ljósmyndum í photoshop sem hún kallar Sögur án orða og er Digital art. Í frístundum í mörg ár hefur hún skissað og málað. Eftir að hafa greinst með brjóstakrabbamein í lok árs 2021 vaknaði aftur þörf að tjá sig með penslum einskonar hugleiðsla. Útkoman eru þessi verk á þessari sýningu.

Sýningaropnun verður fimmtudaginn 9. nóvember  frá  18:00-20:00 og allir velkomnir!

Aðrir opnunartímar:
10. nóvember, föstudagur 13:00-18:00
11. nóvember, laugardagur, 12:00-17:00
12. nóvember, sunnudagur 14:00-17:00