Erró níræður 19. júlí: Ókeypis í Hafnarhús á afmælisdaginn
Listamaðurinn Guðmundur Guðmundsson, betur þekktur sem Erró, verður níræður 19. júlí 2022. Hann fæddist árið 1932 í Ólafsvík á Vesturlandi og var í fararbroddi evrópsku framúrstefnunnar á sjöunda áratugnum. Erró hefur skapað sér nafn sem einn af þekktustu samtímalistamönnum Íslands og hefur einnig lagt sitt af mörkum til evrópskrar málaralistar.
Boðið verður upp á leiðsagnir um sýninguna kl. 12.15 og 16.00.
Sprengikraftur mynda er umfangsmesta sýning sem sett hefur verið upp á verkum listamannsins hérlendis og er sérlega ánægjulegt að bjóða gestum ókeypis í Hafnarhús á afmælisdaginn!
Árið 1989 gaf Erró Reykjavíkurborg stórt safn verka sinna, um 2000 talsins. Í því safni er meðal annars að finna málverk, vatnslitamyndir, grafíkverk, skúlptúra, klippimyndir og önnur listaverk sem spanna allan feril listamannsins allt frá æskuárum. Erró hefur haldið áfram að bæta við gjöfina og keypt hafa verið verk í safnið sem telur nú um 4000 listaverk.
Í tilefni dagsins býður Listasafn Reykjavíkur alla velkomna á sýninguna Erró: Sprengikraftur mynda í Hafnarhúsi frá kl. 10-17.00.
