Bergur Thorberg

Bergur Thorberg myndlistarmaður er fæddur árið 1951 á Skagaströnd. Hann hefur unnið við fjölbreytt störf tengd leiklist og tónlist í gegnum árin t.d. í hljómsveitum eins og Tíglunum, Landreisutríóinu og O‘hara. Síðar meir gaf hann út sólóplötuna “Metsöluplata” sem kom út 1989, á henni var að finna frumsamið efni.

Bergur snéri sér nær alfarið að myndlistinni upp úr 1980 og vann þá mikið með bæði olíu og akrýl í list sinni, en í dag er hann einna helst þekktur fyrir kaffimálverk sín og óvenjulegu aðferðar sinnar við að vinna verkin.

Sú saga hefst árið 1994, þegar Bergur bjó í Portúgal og gerði þar sínar fyrstu tilraunir til að nota kaffi sem málningu.

Hér hefur Bergur Thorberg orðið;

“Það var í sjálfu sér slys að ég byrjaði að nota kaffi í verkin, það hafði slest kaffi á svarthvítar myndir hjá mér og ég var alveg eyðilagður yfir því en sá fljótlega að það var eitthvað nýtt í þessu og ég hætti ekki prufa mig áfram fyrr en kaffið var orðið að fullgildri málningu sem mætti setja á striga. Fljótlega eftir þetta fór ég að vinna öll mín verk á hvolfi og notaði akrýl og kaffiblöndu til að teikna á strigana án þess að snerta strigann. Lét hana leka svo að segja. Til að gera langa sögu stutta þá tók fólk vel í þessi verk mín og hef ég sýnt þau í fjölmörgum Evrópulöndum og einnig í Ameríku. Samtímis vinn ég olíu og akrýlverk, inn á milli hef ég aðeins fengist við videóverk og innsetningar. Þá kemur reynslan úr leikhúsinu og tónlistinni sér vel.”