Norrænt tónlistarkvöld með Tue West og GDRN
Danski söngvarinn og lagahöfundurinn Tue West og hæfileikabúntið GDRN stíga á stokk í Norræna húsinu og streymi og slá lokatóna í viðburðaríka viku í tengslum við Dag Norðurlanda. Tónleikarnir eru haldnir í samstarfi við danska sendiráðið og sendinefnd ESB á Íslandi. Miðar fást í gegnum tix.is hér.
Tue West (DK) er danskur söngvari, lagasmiður og framleiðandi sem búsettur er á Íslandi.West kom fyrst fram árið 2003 og hefur síðan þá gefið út sex sólóplötur auk plötu á ensku með tríóinu Jaruni, Moura og Wesko. West hefur hlotið fjölda viðurkenninga fyrir verk sín.
Guðrún Ýr Eyfjörð Jóhannesdóttir (IS), sem gengur undir listamannanafninu GDRN, þarf vart að kynna fyrir Íslendingum. Hún gaf út sína fyrstu plötu „Hvað ef“ í ágúst 2018 og vakti hún gífurlega athygli. GDRN hlaut fern verðlaun á Íslensku tónlistarverðlaununum 2018 og var tilnefnd til Norrænu tónlistarverðlaunanna sama ár. Nýjasta plata hennar, GDRN, kom út í febrúar 2020 og hefur einnig hlotið verðskuldaða athygli. Tónlistina hennar má skilgreina sem popp með djassáhrifum, í bland við örlítið R’n’B.
Okkur er það mikil ánægja að hafa West og GDRN á tónleikum í Norræna húsinu.
