Síðasta sýningarhelgi og listamannaspjall með Mýrmann á laugardag – allir velkomnir
Víðir Mýrmann býður gestum og gangandi í létt spjall um sýningu sína Tilvist sem lýkur í Gallerí Fold n.k. laugardag. Mýrmann verður á svæðinu til að ræða við gesti frá kl. 13.
Náttúran og landið breytist rétt eins og fólk en á öðrum hraða. Maðurinn hefur þá tilhneigingu að vilja þróast hratt í átt tæknivæðingu og fjær náttúru og landi sem hefur gert það að verkum að mörg okkar hafa misst þessa mikilvæga tengingu við náttúruna og landið sem við höfum áður fyrr.
Tilvist er sýning þar áhorfandanum er boðið að staldra við og leita þess að ná jarðtenginu að nýju; njóta augnabliksins og vera í núinu. „Ég mála út frá innsæinu og ég hlusta á það – afraksturinn eru verkin mín“, segir listamaðurinn sem segist einnig sækja innblástur úr uppruna sínum og nærumhverfi. Hann notast mest við olíu á striga, en hann lærði handtökin hjá hinum virta norska listmálara Odd Nedrum.
Árið 2019 lauk hann mastersgráðu í hönnunarnámi frá UCA í Bretlandi. Mýrmann hefur tekið þátt í fjölmörgum samsýningum, ásamt því að hafa staðið fyrir um tuttugu einkasýningum. Þetta er þriðja einkasýning Mýrmanns í Gallerí Fold.
Sýningin stendur til 25. september.
