Tíra – Bjargey Ólafsdóttir

Tíra – Bjargey Ólafsdóttir

Bjargey Ólafsdóttir sýnir ljósmyndaseríu sem hún nefnir Tíra, í Listasafni Ísafjarðar, Safnahúsinu, Ísafirði. Sýningin opnar laugardaginn 6. mars og stendur til 17. apríl 2021. Sýningin verður opin virka daga kl. 12.00-18.00 og á laugardögum kl. 13.00-16.00. Bjargey verður með listamannaspjall við opnun sýningar sinnar og hefst það kl. 14.00.

Ljósmyndaserían

Tíra var unnin í vinnustofudvöl í Skaftfelli, Seyðisfirði sumarið 2008 og var fyrst sýnd í Ljósmyndasafni Reykjavíkur árið 2009 og síðar í Bronx River Art Center í New York og XYZ í Tokyo. Í kjölfarið var Tíra tilnefnd til tveggja alþjóðlegra ljósmyndaverðlauna: Deutsche Börse Photography Prize og The Godowsky Colour Photography Award. Tíra var sýnd í Skaftfelli, Seyðisfirði og í Þórsmörk í Neskaupsstað í fyrrasumar og er nú hér til sýnis í Listasafni Ísafjarðar.

Bjargey hefur undanfarin ár sýnt list sína hér heima og erlendis. Til að mynda á Listasafni Reykjavíkur, Ljósmyndasafni Reykjavíkur, Kunstverein Munich, KunstWerke Berlin, Galer

ia Traschi, Santiago Chile, Nútímalistasafninu í Stokkhólmi, Manifesta Foundation Amsterdam, XYZ Collective, Tokyo, Japan, The Moore Space Miami, Bandaríkjunum, Manifesta Foundation Amsterdam, Hollandi, Turku Biennale, Finnlandi, MEP, Paris, E-flux New York, WUK Kunsthalle, Vín, Austurríki, Tate Modern London, Palm Springs International film festival, Bandaríkjunum, Gothenburg Film Festival, Svíþjóð, Aix en Provence international short film festival, Frakklandi.

„Listsköpun Bjargeyjar Ólafsdóttur er ekki bundin við einn listmiðil heldur velur hún sér þann miðil sem henni finnst henta hugmyndinni best hverju sinni. Það má því líkja henni við alhliða hljóðfæraleikara því Bjargey fæst við kvikmyndagerð, hljóðverk, gjörninga, teiknar, málar og ljósmyndar. Í þetta skipti er það einmitt ljósmyndin sem hún beinir athyglinni að.

Sýningin Tíra er samansafn táknmynda sem hafa ýmist orðið til í draumum listamannsins eða sprottið fram í vitund hans milli svefns og vöku. Bjargey hrífur áhorfandann með sér inn í heim þar sem fegurð og hið andlega ræður ríkjum; þar sem jafn ólík atriði og hönd guðs, fjöll, töfrakassi, álfaskírnarfontur, slæður og teikningar af háhæluðum skóm koma við sögu, böðuð í dularfullu ljósi og fjölskrúðugum litum. Þrátt fyrir að hún haldi hér áfram að kanna lendur töfraraunsæis og súrrealisma eins og í fyrri verkum sínum, þá beinir Bjargey ekki sjónum sínum að manneskjunni sem slíkri heldur leitast fremur við að ljósmynda tilfinningu sem hefur fundið sér farveg í ofangreindum atriðum. Þar af leiðandi er sýningin ekki bundin saman af eiginlegum söguþræði heldur er eins konar flæði þar sem hægt er að gleyma stað og stund svífa um í tímaleysi eða algleymi.

Tíra fleygir áhorfandanum inn í hringiðu þar sem hugtök eins og dáleiðsla, heilun og sálnaflakk ráða ríkjum í heimkynnum sköpunar og innblásturs. Þessum heimi hins ósýnilega og andlega stillir Bjargey fram sem meðali gegn óhófi efnishyggjunnar sem hefur verið einkennandi lífsviðhorf á okkar dögum og beinir sjónum fólks að því að landamæri raunveruleikans eru kannski fremur fljótandi heldur en bein lína. Markmiðið er göfugt; hún leitast við að ljósmynda hið yfirnáttúrulega – jafnvel sjálfan guð. Og er hægt að ljósmynda hann og má það yfirhöfuð? Eins og Bjargeyju er eiginlegt í sinni listrænu vinnu þá gengur hún að viðfangsefninu fordómalaus og af einlægni og ekki hvað síst ljær því húmor og leik. Hvort sem guð er að finna í töfrakassanum, hvort sem hann er ljósgeisli innan um slæður í forgrunni fjallalandslags eða jafnvel inni í háhæluðu skónum, minnir Tíra okkur á taka eftir að lífsins dásemdir búa í huganum en eru hverfular í hendi …“ (Jóhanna G. Árnadóttir)

Bjargey sýnir ennfremur um þessar mundir í Listasafni Árnesinga, Hveragerði. Sýningin ber heitið Rófurass og stendur til 23. maí næstkomandi.

https://listasafnarnesinga.is/la-art-museum/syningar/rofurass/

www.bjargey.com/

Safnahúsið Eyrartúni hýsir Bókasafnið Ísafirði, Skjalasafnið Ísafirði, Ljósmyndasafnið Ísafirði og Listasafn Ísafjarðar. Söfnin heyra undir Atvinnu- og menningarmálanefnd.

Related Articles

    Skýjaborg

    Skýjaborg

    Allt er byrjað og ekki búið* Skýjaborg er sýning á verkum fjögurra samtímalistamanna sem sprettur úr sameiginlegum gr...

    Ragnar Þórisson

    Ragnar Þórisson

    Laugardaginn 13. mars kl. 16:00 opnar Ragnar Þórisson sýningu á málverkum í Gallery Port. Ragnar Þórisson stundaði nám ...

    Gunnlaugur P. Blöndal listmálari

    Gunnlaugur P. Blöndal listmálari

    Vala Ásgeirsdóttir forsætisráðherrafrú í stuttu spjalli við Vikuna Mynd sem Gunnlaugur Blöndal málaði af Völu 18 ára ...

    Elínborg Ostermann Jóhannesdóttir

    Elínborg Ostermann Jóhannesdóttir

    Elínborg Ostermann Jóhannesdóttir er fædd 1954 í Reykjavík Elínborg flutti til Vínarborgar árið 1974, þar sem hún...


Eyjatúni 400 Ísafjörður

450 8220

[email protected]

safnis.is


6. mars 2021


CATEGORIES




iframe code

NEARBY SERVICES