Vilmundur Örn Gunnarsson

Dagana 28.-30.-október verður Vilmundur Örn Gunnarsson með sýningu í Litla Gallerý.

Verkin eru unnin á pappír með tússi. Þau sýna margskonar strik, strik sem á endanum skapa verk sem sýna mitt sjónarhorn á lífið. Þessi sýning er mitt sjónarhorn og hvernig ég horfi á veröldina í kringum mig.

Ég hef teiknað frá því ég man eftir mér og hef lengi leitað að mínum stíl. Að lokum fann ég strik og línur sem einkenna nú minn stíll.

„Minn stíll brýtur niður umhverfið svo ég geti teiknað það á eins einfaldan hátt og ég mögulega get. Mér finnst að línurnar séu það sem gefa teikningunum mínum líf, ef ekki væri fyrir þær væru teikningarnar frekar innantómar.

Ferlið er þannig að ég teikna einföldustu formin í þeirri mynd sem ég sé í kringum mig, og ég bæti svo við fleiri strikum. Mér finnst betra að vinna verkin hægt og rólega svo verkið komi út á náttúrulegan hátt og svo get ég pælt betur í hvar strikin og línurnar passa.

Mín list snýst mikið um daglegt líf og hversdagslega hluti sem ég sé eins og náttúruna, byggingar eða dýr. Mitt sjónarhorn snýst um hvernig ég sé hversdagsleikann og hvernig listin bætir hann upp.

Þrátt fyrir mismunandi stíla og mismunandi útlit nota allir listamenn sína list til að tjá sig um hvað þeim finnst um veröldina í kringum sig og hvernig sérhver listamaður sér hluti, hvort sem það er teikningar, listmálun, ljóð og svo framvegis. Mín list er þannig.“

Vilmundur tekur vel á móti gestum og allir velkomnir.

F.h. LITLA GALLERÝ

Elvar Gunnarsson

Gallerí stjórnandi / Gallery director